用 123456 做密碼？ 5招教你設安全password

依家呢個年代愈嚟愈多人關注網絡安全問題，有研究就發現「123456」呢個最唔安全嘅密碼，竟然係最多人用嘅！

成日都會有報導叫人唔好用生日做密碼，咁究竟點嘅密碼先算安全，唔易被破解呢？睇完ezone.hk教大家呢 5 招，就會知道點樣 set 個安全密碼！

01. 避免使用易記密碼

雖則好好老生常談，但首要記得唔好用易記而又順序嘅密碼。咩係易記又順序？即係簡單嘅數字組合同順序英文詞彙。

例如：「123456」、「00000」；英文就可能係直接用「password」、或者直接係 keyboard 打「qwerty」等。

02. 避免使用有特殊意義字詞

避免使用容易被聯想到嘅密碼，例如：自己同親人嘅英文名、生日、電話號碼、寵物名，呢類公開又容易被聯想到嘅資料。

特別係依家社交網絡發達，呢類資料好容易係網上搵到，「有心人」輕易就可以取得並將密碼破解。

03. 用複雜密碼組合

密碼愈長就有愈多組合，亦愈難破解。通常設置密碼嘅時候，網站本身都會要求密碼有一定長度，或者好似 Apple 咁，要求密碼有大細楷英文字母，令密碼變得更複雜。專家就建議密碼最好多過 8 位數，而且最好同時包含英文大細楷字母、數字同符號，咁樣黑客就冇咁易破解到啦！

04. 唔同帳戶用唔同密碼

好多人為咗方便易記，會係唔同網站使用同一個帳號同密碼，其實都好危險。萬一安全性較低嘅網站資料外洩時，其他帳號都好易被破解。

05. 定期更改密碼

仲有一樣嘢要做嘅，就係定期更改密碼。特別係網上銀行、Online Shopping 呢類同錢有關嘅帳號，最好有獨立一組密碼，並且定期更改，即使網站資料庫外洩，亦都可以減少風險同損失！

原文刊於：ezone.hk